विक्रेता परवाना न घेता पुणे जिल्ह्यात गौण खनिज साठा, वाहतुक, विक्री करणाऱ्यांचा विद्युत पुरवठा होणार खंडित

पुणे : विक्रेता परवाना न घेता पुणे जिल्ह्यात गौण खनिज साठा, वाहतुक, विक्री करणाऱ्यांवर कारवाईचे निर्देश जिल्हाधिकारी जितेंद्र डुडी यांनी दिले आहेत. दरम्यान जिल्हाधिकाऱ्यांच्या आदेशानुसार पुर्व हवेलीत विनापरवाना गौण खनिज साठा, वाहतुक, विक्री करणाऱ्यांचा विद्युत पुरवठा खंडित करण्याबाबत लोणी काळभोर तहसिल कचेरीकडून वीज कंपनीला पत्रव्यवहार करण्यात आल्याने येथील गौण खनिज व्यावसायिकांचे धाबे दणाणले आहे.

महाराष्ट्र गौण खनिज उत्खनन (विकास व विनियमन) नियम २०१३ अन्वये गौण खनिज विक्रीकरिता विक्रेता परवाना व साठवणूक परवाना घेणे बाबत तरतूद करण्यात आलेली आहे. याबाबतच्या शासन निर्णयान्वये खडी क्रशर धारक यांनी गौण खनिजाच्या अनुषंगाने महाराष्ट्र गौण खनिज उत्खनन (विकास व विनियमन) नियम, २०१३ अन्वये व्यापारी परवाना घेणेबाबत नमूद आहे.

तसेच खडी क्रशर वा स्टोन क्रशरसाठी वापरण्यात येणाऱ्या गौण खनिजाच्या वापराबाबत परिशिष्ट-अ (आवक नोंदवही) व परिशिष्ट-ब (जावक नोदवही) प्रमाणे नोंदवही ठेवणेही बंधनकारक असून त्याबाबतचा ताळमेळ वेळोवेळी क्षेत्रीय अधिकारी अथवा कर्मचारी यांचेकडून तपासण्यात येणार असल्याचेही नमूद करण्यात आले आहे.

महाराष्ट्र प्रदूषण नियंत्रण मंडळाकडील संदर्भानुसार जिल्ह्यात एकूण ३७९ स्टोन क्रशर असून क्रशर धारकांच्या उपलब्ध यादीनुसार कार्यक्षेत्रातील क्रशरची तपासणी करून त्याबाबत्तचा अहवाल सादर करण्याच्या सुचना तसेच गौण खनिजाची विनापरवाना अवैध पध्दतीने विक्री व साठा करणाऱ्या व्यावसायिकांवर महाराष्ट्र जमीन महसूल अधिनियम, १९६६ मधील कलम ४८ (७) व (८) नुसार दंडात्मक व फौजदारी स्वरुपाची कारवाईचे निर्देशही सर्व तहसिलदारांना देण्यात आले होते.

त्यानुसार तहसिल कचेरीकडून संबंधितांना नोटीसा दिल्या असून पूर्वीच्या परवान्याची मुदत दिनांक ३१ डिसेंबर २०२५ रोजी संपुष्ठात येत असल्यामुळे सर्व क्रशर धारक व साठा परवानाधारकांनी पुणे जिल्हाधिकारी कार्यालयातील जिल्हा खनिकर्म विभाग येथे नमुना-प अन्वये आवश्यक कागदपत्रांसह www.mahakhanij.gov.in या संकेतस्थळावर ऑनलाईन अर्ज सादर करुन सन २०२६ करिता तातडीने विक्रेता परवाना व साठा परवाना प्राप्त करुन घेण्याचे आवाहन करण्यात आले आहे.

दरम्यान विक्रेता परवाना न घेता पुणे जिल्ह्यात गौण खनिज साठा, वाहतुक, विक्री करणाऱ्यांचा विद्युत पुरवठा खंडित करण्याबाबत तहसिल कचेरीकडून वीज कंपनीला पत्रव्यवहारही करण्यात आल्याने गौण खनिज व्यावसायिकांचे धाबे दणाणले आहे.

………….…………..